Aurkezpenean, Denboraren Optikoetako baten laguntzagaz, Leioako 2.026 herritarren erretratuz osatutako obra kolektiboa erakutsiko dute lehen aldiz. Muralak gaur egungo Leioaren argazki kolektiboa osatzen du, eta herritarrak berak bihurtzen ditu memoria kolektiboaren protagonista.
Iban Rodriguez Etxebarria alkatearen esanetan, muralak artearen esparrua gainditzen du. "Mural hau arte-lan bat baino askoz gehiago da; gaur egun herri gisa garenaren isla da. Argazki bakoitzak istorio bat kontatzen du, eta guztiek batera 2026ko Leioaren erretratua osatzen dute", adierazi du.
Herri oso baten erretratua
Martxotik maiatzera bitartean garatu dute ekimena, eta milaka herritarrek parte hartu dute bertan. Adin, jatorri eta ibilbide askotako leioaztarrak argazkilari profesional baten aurrean erretratatu dira, egungo herriaren isla osatzen laguntzeko.
Antolatzaileen arabera, erretratu bakoitzak istorio pertsonal bat gordetzen du, baina guztiek batera aniztasuna, bizikidetza, nortasuna eta komunitate-sentimendua irudikatzen dituzte. Horrela, Orainaren Begiradak ekimenak gaur egungo Leioaren aurpegia erakusten du, herria egunero eraikitzen duten pertsonen bidez.
Herritarrak, ospakizunaren erdigunean
Leioaren 500. urteurreneko programazioaren barruan kokatutako proiektu honek herritarrak jarri ditu berriro ospakizunaren erdigunean. Udalaren arabera, ekimenaren helburua komunitate-loturak sendotzea eta herriaren historia datetatik eta gertakari handietatik harago doala gogoratzea da.
Izan ere, bost mende hauetako ibilbidea ospatzeko modurik onena etorkizuneko Leioa eraikitzen ari diren pertsonak aitortzea dela azpimarratu dute sustatzaileek. Muralak, horrenbestez, herriaren iragana eta oraina lotzen ditu, etorkizunari begira.