Aurtengo edizioan 24 selekziok hartuko dute parte, gizonezkoen zein emakumezkoen kategorietan. Guztira, ia 500 lagun bilduko dira Sarrienako udal zelaietan, jokalariak eta talde teknikoetako kideak kontuan hartuta. Herrialde, kultura eta komunitate ezberdinek kolorez eta giroz beteko dute txapelketa, beste behin ere.
Mundialitoa ekainaren 27an hasiko da inaugurazio-ekitaldiagaz, eta sei jardunalditan zehar jokatuko da, abuztuaren 1eko finaletara arte. Antolatzaileen aurreikuspenen arabera, jardunaldi bakoitzean 1.500 ikusle inguru hurbilduko dira Sarrienara.
Leioako alkate Iban Rodriguez Etxebarriak nabarmendu duenez, Mundialitoa "futbol txapelketa bat baino askoz gehiago" da: topagune bat, bizipen eta jatorri desberdinetako pertsonak elkartzeko espazioa. Alkatearen esanetan, 25. ediziora iristeak erakusten du proiektuak balioei eutsiz hazten jakin duela.