Taldeak salatu duenez, 2020an onartutako egitasmoak Lamiakoko padura bere tamainaren heren batera mugatuko luke. Beste heren bat etxebizitzak eraikitzeko erabiliko litzateke, eta gainerako zatia parke bihurtuko litzateke. Horren ondorioz, egun dagoen hezegunea bi gune txikitan banatuta geratuko litzateke, itsasadarraren ertzean padura zati txiki bat baino ez utziz.
Erakunde ekologistaren ustez, proiektuak galdu egiten du padura bere osotasunean leheneratzeko aukera. Horregatik, Leioako Udalari eskatu dio auzokideen eta gizarte eragileen eskaerak entzun ditzala eta egitasmoa aldatu dezala. Haien proposamena aurreikusitako etxebizitzak eta parkea ez egitea da, baita eremu osoa Lamiakoko padura lehengoratzera bideratzea ere.
Ecologistas en Accionek bandera beltzak urtero banatzen ditu, kostaldean antzemandako kutsadura eta ingurumenaren kudeaketa txarraren adibiderik esanguratsuenak salatzeko. Aurtengo txostenean ere, Lamiakoko paduraren kasua Bizkaiko adibide nagusietako bat dela nabarmendu du, eta hezegunea berreskuratzea lehenesteko deia egin du.