Txikienentzako Udatxiki programan, 2 eta 6 urte bitarteko 311 umek hartu dute parte. Hilabete osoan zehar, irudimena eta sormena lantzeko jolasak, psikomotrizitate jarduerak, ur-jolasak eta astero igerilekura eta parkera irteerak egin dituzte, beste hainbat ekintzaren artean. Programa honek, gainera, euskararen erabilera sustatzea izan du ardatz, dena giro ludiko eta atsegin batean.
Bestalde, UDA programak ia 800 haur bildu ditu aurten. 2013 eta 2019 urteen artean jaiotako umeei zuzendutako ekimenak hamabostaldika garatu dira, eta kirola, ohitura, elkarbizitza, inklusioa eta euskararen erabilera izan dira egitasmoaren oinarriak.
Parte-hartzaileek herriko kirol-klubakaz elkarlanean antolatutako hainbat modalitate ezagutzeko aukera izan dute, hala nola eskubaloia, futbola, esgrima, eskalada, patinajea, esku pilota, kalistenia, boxeoa, xakea, saskibaloia edo judoa. Horrez gain, igerilekuko eta hondartzako jarduerak, ur-jolasak, txangoak, hipika, abentura-ekintzak, eskulan-tailerrak eta jarduera inklusiboak ere izan dituzte.