Lehenengo aukera Eraikin eta lokaletan gainazalak eta altzariak garbitzea Profesionaltasun Ziurtagiria izango da. Garbiketaren sektorean lan egin gura duten langabeei zuzenduta dago eta hamar plaza izango ditu. Irailetik martxora egingo dute, 09:30etik 14:30era. Prestakuntza teorikoaz gain, parte-hartzaileek praktikak egingo dituzte enpresetan eta bakoitzaren egoerara egokitutako laneratze-ibilbidea izango dute.
Urrian, berriz, Eraikinen Barruko Pintura ikastaroa egingo dute. Leioako langabeei zuzendutako hamabi plaza egongo dira, eta parte-hartzaileek etxebizitza eta lokaletako gainazalak prestatu eta barrualdeak margotzeko oinarrizko ezagutza eta trebetasun praktikoak landuko dituzte. Saioak 09:30etik 14:30era izango dira, Behargintza Leioan eta kanpoko beste prestakuntza-gune batzuetan.
Bestalde, DFB 3R Birlaneratze Programak langabezian dauden pertsonei lan-mundura bueltatzeko laguntza eskainiko die. Hiru ardatz izango ditu: lan-orientazioa, birlaneratzea eta birkualifikazioa, azken hori gaitasun digitaletan eta lan-aktibazioan oinarrituta.
Negozio bat sortzeko edo marketin digitalean trebatzeko
Norbere negozioa martxan jartzea buruan dutenentzako aukera ere egongo da. Enpresak Sortzea eta Kudeatzea ikastaroak 20 plaza izango ditu eta azaroan egingo dute, 09:30etik 14:30era, Leioako Enpresen Mintegian. Leioan erroldatuta eta Lanbiden izena emanda dauden langabeei zuzenduta dago. Parte-hartzaileek euren negozio-ideiaren bideragarritasuna aztertzen, estrategia komertziala lantzen eta merkatuan izan ditzaketen aukerak baloratzen ikasiko dute.
Hilabete berean, Marketina eta Sare Sozialak ikastaroa ere eskainiko dute, hamabi plazagaz. Kasu honetan, enpresentzako marketin digitalean trebatu gura duten Leioako langabeei zuzenduta egongo da. Sare sozialen kudeaketa, eduki digitalen sorkuntza eta enpresa txiki eta ertainentzako publizitate-kanpainak lantzeko ezagutzak eskainiko dituzte.
Izena emateko epea irailaren 1ean zabalduko da. Interesa dutenek Behargintza Leioaren egoitzan bertan edo haren webgunearen bidez egin ahal izango dute izen-ematea.