Leioako Udalak jakinarazi duenez, tokiko moda-desfilea jarriko du abian, merkataritzari ikusgarritasuna eman, indartu eta babesteko helburuagaz. Izan ere, ekimenak "estetika- eta edertasun-establezimenduak eta profesionalak jarriko ditu balioan", eta irailaren 24an, 19:30ean, Artatza Jauregian egingo den desfileagaz amaituko da.
Horregaz, tokiko merkataritzaren eskaintzaren aniztasuna eta kalitatea herritarrengana hurbildu gura dutela azaldu dute; eta, aldi berean, hurbileko kontsumoa sustatzea eta merkataritzaren eta Leioan bizi diren pertsonen arteko lotura indartzea ditu helburu, kale biziak eta gertuko eta askotariko merkataritza-sarea mantentzen laguntzeko.
Leioa Modan udalerriarentzat bereziki esanguratsua den urte batean jarriko da abian, Leioak 500 urte bete dituen urtean. Horrela, ekimena 500. urteurrenaren ospakizunetara gehitzen da merkataritzaren arlotik, gaur egungo Leioari eta udalerriari egunero bizia ematen dioten pertsonei eta negozio txikiei begira", gaineratu du Udalak.