Eguna etxeko txikienek zabalduko dute. 13:00etatik 14:00etara, gazta zelan egiten den ikasteko tailerra egingo dute, 5 urtetik gorako ume leioaztarrei zuzenduta. Umeek heldu bategaz joan beharko dute, eta modu praktikoan ezagutuko dute gazta egiteko prozesua. Tailerra doakoa izango da, baina plazak mugatuak direnez, irailaren 30a baino lehen eman beharko da izena 500urte@leioa.eus helbidera idatzita.
Bazkaria 15:00etan hasiko da, eta lau platereko menua prestatu dute: txanpiñoiak Pedro Ximenez ardo-murrizketagaz; Goiherriko tomatea burrata eta pestoagaz; itsaskiz betetako legatza saltsa amerikarrean; eta, amaitzeko, pantxineta txokolate beroagaz. Ardoa eta kafea ere sartuko dira menuan.
Bazkariak 20 euroko prezioa izango du eta 45 lagunentzako lekua egongo da. Parte hartu gura dutenen 500urte@leioa.eus helbidera idatzi beharko dute; antolatzaileen erantzuna jaso ostean egin ahal izango dute ordainketa transferentzia bidez.
Idiazabal gazta, gertutik
17:00etan Idiazabal gaztaren inguruko hitzaldia eskainiko dute, eta Idiazabaldik etorritako hizlari batek produktuaren inguruko ezagutzak eta berezitasunak partekatuko ditu bertaratutakoakaz. Saioa doakoa izango da, ez da izena eman beharko eta lekua bete arte sartu ahal izango da.