Helburua ez da Leioako musikaren eta dantzaren historia osoa idaztea izan, urteetan pilatutako memoria gal ez dadin bermatzea baizik. Bildutako materialen artean soinu- eta ikus-entzunezko grabazioak, argazkiak, liburuak, kontzertu-programak, gutunak, memoriak eta bestelako dokumentuak daude. ERESBILen gordetzeaz gain, Leioako Udal Kontserbatorioak eta Udal Artxiboak funts osoaren kopia digital bana izango dute.
Lan horrek azken hamarkadetan herriko musika-bizitza eraiki duten pertsona eta taldeei begiratzeko aukera ere eman du. Horien artean Leioako Udal Kontserbatorioa dago, 1985ean sortua. 41 urteko ibilbidean, musikari-belaunaldi ugari prestatu ditu, eta hainbat musika-talde eta proiektu sortzen lagundu du; horietako batzuek Leioatik kanpo ere jarraitu dute euren ibilbidea.
50 urte atzera, pantaila handi baten bidez
Herritarrek bildutako altxorretako bat ikusteko aukera izango dute urriaren 3an, 19:00etan, Leioako Kontserbatorioko Auditoriumean. Leioa musikaz eta dantzaz ekitaldian ikerketa eta dokumentu-artxiboa aurkeztuko dituzte, Iban Rodriguez alkateak, Itziar Bilbao Kontserbatorioko zuzendariak eta Karmelo Sainz de La Maza alkate ohiak parte hartuta.
Ondoren, denboran atzera egiteko aukera izango dute bertaratutakoek: Leioako San Juan Bautista Abesbatzak 1976ko apirilaren 26an eskainitako kontzertu baten grabazioa proiektatuko dute. RTVEk duela 50 urte grabatutako emanaldia da, eta digitalizazio-lanaren bidez berreskuratutako ikus-entzunezkoetako bat.
Egitasmoak urriaren 15ean izango du jarraipena, 19:00etan, San Juan Bautista elizan egingo duten bigarren ekitaldiagaz. Bi hitzorduak herritar guztiei irekita egongo dira, eta Leioaren 500. urteurreneko ospakizunen barruan antolatu dituzte.