Gaia Udalaren ezohiko osoko bilkuran landu dute. Kezka berezia dago Artaza-Romo institutuaren inguruan; izan ere, 70 irakaslek baino gehiagok euren kezkak helarazi dizkiote Hezkuntza Sailari, Lan Ikuskaritzaren esku-hartzea eskatu dute eta Romo Eskolako Eskola Kontseiluak ere eskaera horren alde egin du. Artaza-Romok, gainera, obrek izan ditzaketen eraginei eta aurreikusitako babes-neurriei buruzko informazioa eskatu du, baina oraindik ez du erantzunik jaso.
Kezketako bat zarata da. Akustika eta Bibrazioen Azterketa berriak jasotzen duenez, neurri zuzentzaileak hartuta ere kalitate akustikoaren helburuak gaindituko lirateke zenbait kasutan. Horren aurrean, Interbiasek 3. eta 4. loteetako obra batzuetan helburu horiek aldi baterako etetea eskatu du. Eskaera egin dutenek salbuespen hori ezin dela obrek iraungo duten urteetarako "baimen generiko" bihurtu ohartarazi dute.
Bibrazioak eta airearen kalitatea ere kontrolatzeko eskatu dute, bereziki aurreikusitako leherketak kontuan hartuta. Neurketak non eta zelan egingo diren, zein mugatik aurrera esku hartu beharko den eta arazoak antzemanez gero zer neurri hartuko diren obrak hasi aurretik argitzea gura dute. Emaitzak, gainera, bizilagunen eta ikastetxeen eskura egotea eskatu dute.
Horretarako, Leioako Udalari Hezkuntza Sailari eta Bizkaiko Foru Aldundiari beharrezko informazioa galdegiteko, babes-neurrien jarraipena egiteko eta hezkuntza-komunitateagaz etengabeko harremana izateko eskatu diote. "Bermeak ez dira paperaren gaineko konpromisoak soilik", azpimarratu dute; neurri "zehatzak, egiaztagarriak eta zorrotz aplikatuak" gura dituzte obrak egiten diren bitartean.