Maitasuna hitzez adierazteko aukera izango dute aurten ere leioaztarrek. Izan ere, Leioako Udalak Maitasun Gutunen Lehiaketaren 27. edizioa antolatu du, herritarrak euren sentimenduak paperera eramatera animatzeko. Abenduaren 15era arte egongo da lanak aurkezteko aukera.
Lehiaketaren helburua idazketaren bidez sentimenduak adieraztea eta gutunek literatura-genero gisa duten balioa aldarrikatzea da. Parte hartzeko ez dago adin-mugarik, eta lau kategoria egongo dira: 25 urte artekoak, 26 eta 45 urte bitartekoak, 46 eta 65 urte bitartekoak eta 66 urtetik gorakoak.
Kategoria bakoitzean bi sari banatuko dituzte. Irabazleak 250 euro, garaikurra eta diploma jasoko ditu; bigarren sailkatuak, berriz, 125 euro, garaikurra eta diploma.
Bi gutun aurkezteko aukera
Parte-hartzaile bakoitzak gehienez bi gutun aurkeztu ahal izango ditu, euskaraz edo gaztelaniaz. Lanek gehienez bi orrialde izan beharko dituzte, alde bakarretik idatzita, eta originalak zein argitaragabeak izan beharko dira. Gainera, ezin izango dute aurretik beste lehiaketarik irabazi.
Gutunak hiru aletan aurkeztu beharko dira, egilea identifikatzeko daturik gabe. Aurtengo oinarrietan, gainera, berariaz zehaztu dute ezin izango dela adimen artifizialik erabili gutunak sortzeko.
Epaimahaiak idazteko estiloa, testuaren garapena, aurkezpena eta originaltasuna hartuko ditu kontuan. Eskuz idatzitako gutunen kasuan, kaligrafia ere baloratuko dute.
Lanak abenduaren 15era arte aurkeztu daitezke
Gutunak Kultur Leioan entregatu ahal izango dira, zuzenean edo postaz, Jose Ramon Aketxe plazako 11. zenbakian. Gutun-azalaren kanpoaldean "Maitasun Gutunen XXVII. Lehiaketa" idatzi beharko da. Lanak aurkezteko epea abenduaren 15ean amaituko da, baina postaz bidalitakoek abenduaren 19ko zigilua izan ahalko dute, beranduenez.
Irabazleen izenak 2027ko otsailaren 13an egingo den sari-banaketan ezagutaraziko dituzte. Ekitaldia 18:30ean izango da, Kultur Leioan, eta saritutako gutunak irakurtzeko aukera ere egongo da.