Iban Rodriguez Etxebarria Leioako alkatea, Udalbatzako hainbat ordezkari eta herritarrak elkartu dira gaur goizean, 10:00etan, terrorismoaren eta indarkeriaren biktimak gogoratzeko.
Omenaldian, alkateak lore-sorta bat utzi du Leioaren Indarra eskulturaren ondoan, eta, ondoren, bertaratutakoek minutu bateko isilunea egin dute, Udal Kontserbatorioaren musika-emanaldiagaz lagunduta.
Memoriaren Eguna 2010etik ospatzen da Euskadin, azaroaren 10ean, terrorismoaren eta indarkeriaren biktimak gogoratzeko eta haien aitortza aldarrikatzeko. Data hori aukeratu zuten, ordura arte egun horretan Euskadin atentatu hilgarririk gertatu ez zelako.