Leioako herritarrek beste gune bat izango dute hemendik aurrera Gizarte Zerbitzuetara jotzeko. Izan ere, Udalak bigarren arreta-bulegoa zabaldu du Lamiakon, Langileria kaleko 88. zenbakian, lehen posta-bulegoa zegoen lokalean.
Gizarte Zerbitzuak II izena jarri diote bulego berriari, eta bertan herritarrei harrera egin eta lehen arreta eskainiko diete. Hasiera batean, orain arte Gizarte Zerbitzuen lehen bulegoan egiten diren lan berberak egingo dituzte, eta arreta jasotzeko aurretiazko hitzordua eskatu beharko da.
Bulego berriak lehenengoaren ordutegi bera izango du: astelehenetik eguenera, 08:30etik 14:30era. Informazioa jaso edo hitzordua eskatu gura dutenek 94 480 13 36 telefono-zenbakira deitu edo gizartezerbitzuak@leioa.eus helbidera idatzi dezakete.