Unai Andrakak, EAJren zerrendaburua, hartu du Lemoizeko alkatetza, gehiengo osoagaz. Hautagai jeltzaleak bere kideen aldeko sei botoak eskuratu ditu; EH Bilduko hiru zinegotziek, berriz, Tasio Olabarrieta hautagaiaren alde bozkatu dute. Hartara, Andraka da datozen lau urteetarako alkatea.
Alkatea aukeratu ostean, Gabriela Frances koalizio abertzaleko zinegotziak hartu du hitza; Lemoizentzat lan egiteko grina erakutsi du, “intentzio onenarekin”. Era berean, aurten udal talde “potentea” lortu dutela azaldu du; hala, oposizioan “modu eraikitzailean eta errespetu osoz” lan egingo dutela esan du. Halaber, osoko bilkurak lan ordutegietatik kanpo egiteko eskatu du, “arrastietan edo aste akabuetan, horrela jendea etorri ahal izateko eta parte hartu ahal izateko”.
Osoko bilkura amaitu baino lehen, Lemoizeko Gure Esku Dago taldeko kide batek hartu du hitza, eta Udalari emandako aukerengatik eskerrak eman ostean, ekainaren 21eko ekimenean parte hartzeko gonbitea luzatu die aretora bertaratutako guztiei eta zinegotziei eurei ere.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
