Denbora-tarte horretan, zirkuituko azken proba egingo ez balitz, sailkapen orokorrak gaur egun dauden legez geratuko lirateke. Dena den, kategoria nagusian zein gazte-mailan horrek ez luke eragingo, surflari bakoitzaren hiru emaitzarik onenak hartzen direlako kontuan. Hala, Lemoizko olatuetan erakustaldia eman ala ez, Alex Odriozola zumaiarrarentzat izango da Euskal Bodyboard Zirkuituaren txapela. Izan ere, Donostian, Sopelan eta Zumaian irabazteagatik metatutako 3.000 puntuek matematikoki txapeldun bihurtu dute daborduko. 18 urte azpiko kategorian ere, garrantzirik ez dauka zentraleko olatua hoberen nork hartuko duen. Unai Zubizarreta oriotarra txapeldun berria da; Donostian eta Zumaian irabazi zuelako, eta 2.730 puntu lortu dituelako.
Euskal Herriko Surf Federazioak (EHSF) antolatutako Euskal Bodyboard Zirkuituak Lemoizko Basorda kalan izango du bere laugarren eta azken etapa, Lemoizko zentral nuklearraren aurrean. Zapatu honetan, urriak 15, hasiko da eguraldi eta olatu egokien itxarote-aldia; behar izanez gero, epea azaroaren 20ra arte luzatuko da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun