Etzandarri mendi-taldeak bost urte beteko ditu aurten

Etzandarri taldeak hilabetero egiten du mendira irteera. 2015ean sortu zuten Lemoizko guraso batzuek, euskararen erabilera eta mendizaletasuna bultzatzeko helburuagaz. 2019an, gainera, irteera horietan berrikuntza bat gehitu zuten: argazki-lehiaketa. Edonork parte har dezake taldean, beti ere euskaraz badihardu.

Etzandarriko kideek eurek azaltzen dutenez, lagun-talde batek osatzen du taldea eta irteerak prestatzen eta gidatzen dituztenak guraso boluntarioak dira. Kontuan izan behar da taldeko kideek ez dutela inongo asegururik kontratatzen irteeretarako, eta honenbestez nor bere segurtasunaren arduraduna dela. Etzandarriko kideek gogorarazten dute parte hartzen dutenek aurreikusi behar dutela mendi-irteerek arriskuak izan ditzaketela.

Umeen artean euskara bultzatzeko ekintza denez gero, joan gura duten gurasoek ondo egin beharko dute euskaraz.

Etzandarri taldearen hurrengo irteerak

  • Martxoak 22: Bagatza (563m) eta Eskorieta (642m)
  • Apirilak 19: Lekanda (1309m)
  • Maiatzak 31: Mendian ere euskaraz: Baio (1197m) eta Mirutegi (1167m)
  • Ekainak 28: Burbona (934m)
  • Irailak 27: Albertia (867m) eta Isuskitza (801m)
  • Urriak 18: Kolitza (883m)
  • Azaroak 15: Pico del Carlista (721m)
  • Abenduak 20: Lularri (1884m) eta Etzandarri (209m) 

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun