Daborduko prest dago Lemoizko eskolako jantoki berria

Lemoizko jangela berria egiteko Udalak Eusko Jaurlaritzaren laguntza izan du. © LEMOIZKO UDALA

Urizar auzoan dagoen Lehen Hezkuntzako Eskolako jantoki berria aste honetan estreinatu dute, azken hilabeteotan egindako obren ondoren. Sukaldea duen jantokia da, beraz, datorren ikasturteari begira, langile propioak izango dituela ere iragarri dute. Instalazio berriak ezagutzera emateko, aurreko egunean, ekainaren 2an, gurasoentzako ate irekien jardunaldia egin zuten.

Mankomunitate iturriek azaldu dutenez, zerbitzu berrituari esker kalitatezko elikadura orekatua eta osasungarria eskainiko diete ikastetxeko ikasle, irakasle eta langileei; gainera, tokiko ekonomia bultzatzen lagunduko duten produktu jasangarrien eta zero kilometrokoen aldeko apustua ere egingo dute.

Eusko Jaurlaritzak, Lemoizko Udalaren laguntzagaz, ikastetxetik Udalari helarazitako eskaerari erantzuna ematen diote esku-hartze horregaz. Hala, Jaurlaritzak 500.000 euro baino gehiago inbertitu ditu eta jantoki berriaz gain, eraikinaren sarrerak eta ikastetxearen kanpoko urbanizazioa ere hartu ditu obrak.

Iñaki Alonso udalerriko alkatea oso pozik agertu da zuzendaritzak eta, oro har, hezkuntza-komunitateak egindako eskaera nagusietako bat gauzatu ahal izan delako. "Ez zen soilik gurasoen eskaera, baizik eta gobernu-talde honen konpromisoa zen proiektua legegintzaldi honetan aurrera eramatea. Pandemiak moteldu egin zuen proiektuaren garapena, baina, azkenean, Eusko Jaurlaritzaren eta Udalaren konpromisoari esker, eta hezkuntza-komunitatea osatzen duten pertsona askoren lan onari esker, familiek zerbitzu horretaz gozatzeko aukera izatea lortu dugu", azpimarratu du Alonsok. Era berean, alkateak eskerrak eman dizkie ikastetxeko zuzendaritzari eta IGEri, proiektua bide onera iritsi ahal izateko izan duten sintonia eta lankidetzagatik. Alonsoren esanetan, "honelako proiektuek Lemoizen eta bere inguruan populazioa finkatzen laguntzen dute, eta, gainera, ikasleen familien lana eta familia bateragarri egiteko aukera emango du".
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun