Herriko bizilagunen artean doan banatuko den Lemoiz 2024ko egutegia osatzeko helburuagaz, tokiko Udalak argazki lehiaketa bat jarri du abian. Lehiaketa horren gaia Lemoizko herria eta bertako jendea izango da eta irabazleak Euskal Herriko produktuen saski bat eramango du etxera. Argazkiak (pertsona bakoitzeko hiru gehienez) garaikideak edo zaharrak izan daitezke, eta azaroaren 6tik 10era bitartean entregatu ahal izango dira, bi modutan: Armintzako Kultur Etxean, 17:00etatik 20:30era, edota lemoiz.lehiaketa@gmail.com helbide elektronikoan. Hala, Lemoizko Udalak herriko berezitasuna, txokoak, jendea eta historia ikusarazi gura dituen lehiaketan parte hartzera animatu gura ditu herritarrak. Lehiaketaren oinarriak hemen kontsulta daitezke.
Formatuari eta ezaugarriei dagokienez, irudiek horizontalak izan beharko dute, 13 zm x 18 zm-ko tamainan inprimatutako argazkietarako, eta gutxienez 300 x 300 px-ko erresoluzioa digitaletarako; azken horietan, ezin izango dute 3MBko pisua gainditu. Halaber, argazki bakoitza egilearen izen-abizenakaz, izenburuagaz eta ateratako urtea jarrita aurkeztu beharko da.
Bestalde, 2024ko egutegia osatuko duten 12 argazkiak aukeratzeko, epaimahai bat osatuko dute. Epaimahaia, arte arloko profesional batek, Kultur Etxeko kultur dinamizatzaileak eta Udaleko bi ordezkarik osatuko dute, eta irudiaren kalitatea, originaltasuna eta lehiaketaren oinarriak betetzen diren baloratuko dute.
Irudiak aukeratu ondoren, erakusketa bat egingo da Armintzako Kultur Etxean. Bertan, herri bozketa bat egingo dute horietako hiru aukeratzeko eta saria Euskal Herriko produktuen saski bat izango da. Bozketa azaroaren 13tik 17ra egingo dute, aukeratutako argazkiaren izenburua hautetsontzi batean sartuta. Erakusketa azaroaren 24ra arte egongo da zabalik, gura duten guztiek herriari eta bertako jendeari buruzko argazkiak ikus ditzaten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
