Herritarren hizkuntza eskubideak bermatzearen aldeko lanketari ekingo diola iragarri du Lemoizko Udalak

Iker Rincon Moreno 2023ko abe. 4a, 11:38

Abenduaren 3an ospatu da Euskararen Nazioarteko Eguna Euskal Herri osoan eta, besteak beste, Lemoizen ere egitarau berezia izan dute gozagai egunotan data horri gorazarre egite aldera. Horregaz batera, Lemoizko Udalak adierazpen instituzionala onartu du, aho batez, euskararen aldeko bere posizioa nabarmentzeko.

Adierazpen instituzionala, osorik

Euskararen alde inork egin dezakeenaz galdetu  ohi dugu sarri euskal hiztunok,  bereziki Euskararen  Nazioarteko Egunaren inguruko gogoetan. Ezin uka,jakina, egin beharreko galdera  eta  gogoeta  dela,  baina  ez  litzateke  inola  ere  zilegi, are  gutxiago  baliagarria, ikuspegi horretara mugatzea euskararen aldeko jarduera.

Euskararen nazioarteko eguna 1949ko abenduaren 3an ospatu zen lehen aldiz, Eusko lkaskuntzak antolatuta, euskara euskal gizarte osoaren eta gizateria osoaren  ondare gisa sustatzeko.

Euskara hizkuntza gutxitu gisa normalizatzeko 40 urteko politiken ondoren, euskara ezagutu, ulertu eta hitz egiteko ahalmena duten herritarren  kopurua  handitu egin  da, baita Lemoizen ere. Hala ere, gure erronka nagusia euskararen erabileran datza, eta horretarako baldintza egokiak sortu behar ditugu erabilera hori modu errazean, praktikoan eta inolako eragozpenik gabe etengabean herritarrari eskaintzeko, bai administrazioan, egunerokotasunean herritarrek bideratzen dituzten kultur eta gizarte eginkizun guztietan, eta nola ez, garai honetan gure kultur, komunikazio, eta gizarte garapenean  bektore nagusi  bilakatu den  mundu digitalean.

Azken urte hauetan, euskarak ukatu ezineko urratsa egin du administrazio publikoan. Erabat gaztelaniaz funtzionatzen zuen administrazioa  euskalduntzeko  bide  luzea egin da, hainbat erakundek ia erabat euskaraz funtzionatzera heldu arte. Baina bide luze honek ere izan ditu bere eragozpenak, hor ditugu adibidez  aurten  publiko  egin diren azken ebazpen judizial batzuk, zalantzan jarria z euskararen oinarrizko egitura juridikoa . Hizkuntza gutxitua da gurea, eta hizkuntza gutxitu baten biziberritze prozesuan egiten den sustapena eraginkorra izango bada, babesa behar du, babes osoa,  baita  lege­ babesa ere.

Euskal jendartearen  gehiengoak  euskararen  aldeko jarrera  du, eta erakunde  publikoei dagokigu  euskararen  biziberritzea  benetakoa  eta  noranahikoa  izatea  ahalbideratuko duen  akordio  sozial  eta  politiko  zabala  lortzeko  bidea  egitea.  Abenduaren  3a  egun aproposa  da  bide horren abiapuntua  marrazteko. Adostasunez  nora goazen  argi  esan, eta egin beharreko  urratsak zehazten  hasteko garaia da.

Lemoizko Udalak, herritarren hizkuntza eskubideak bermatzearen aldeko lanketari ekingo dio, eta zeregin honetan, adierazpen hau sinatzen dugunok, horretarako konpromisoa hartzen dugu.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun