Etzandarri mendi-taldea

Marian Gaztainaga: "Gazteak euskaraz mintzo eta konturatzen dira ez dela soilik mendiko kontua"

Nahia Martinez Gondra 2023ko abe. 5a, 10:06
15 pertsona inguru joan ohi dira hilean behin antolatzen dituzten mendi-irteeretara.

Pasa den domekan, abenduak 3, Euskararen Nazioarteko Eguna izan zen. Alabaina, euskara egunero presente egon beharreko hizkuntza da, eta horren alde egiten du Marian Gaztainagak: 2015ean sortu zuen bere senar Iosu Alberdigaz batera Etzandarri euskal mendi taldea, Lemoizen euskara eta kirola bat egiteko asmoz.

Duela zortzi urte, Marian Gaztainagak eta bere senarrak pentsatu zuten momentua zela euren alabak kirolen batean hasteko, eta, Lemoizko euskararen erabilera urriari erreparatuz, Etzandarri mendi taldea sortzea okurritu zitzaien. Hala, kirola eta euskara elkartuz, arazo biri irtenbide bakarragaz eman zioten konponbide. "Taldea sortzeko beste mendi talde batzuetako webguneen adibideak eta erreferentziak genituen. Izan ere, badagoz horrelako ekimenak, baina ez euskara hutsean", azaldu du Gaztainagak. 

Taldearen eraketa modu "naturalean" eman zen: "Hasieran, gertuko gurasoak eta gure alaben lagunak etortzen ziren. Egun, eskualdeko beste herrietako mendizaleak ere animatzen dira". Hala, 15 pertsona inguru joan ohi dira hilean behin antolatzen dituzten mendi-irteeretara. 

Lemoizko egoera soziolinguistikoari dagokionez, uste du herritar nahikok dakitela euskaraz, baina gero horietako gutxik erabiltzen dutela euren egunerokoan: "Gazteek derrigortuta erabiltzen dute arlo akademikoan, baina, gero, ikastetxeetatik kanpo, ez da arrunta euskara entzutea hemen. Gurasoek ere jakin arren ez dute euskaraz egiten haien artean". 

Halaber, Gaztainagak aitortzen du taldea sortzerakoan pertsona batzuek zalantzan jarri zutela euskara jakitearen baldintza. "Baina guk argi genuen zer nahi genuen eta, azkenean, nik uste dut jendeak ulertu duela. Baina, zoritxarrez, badirudi batzuentzako zerbait ez zegoela ondo euskara hutsezko mendi talde bat sortzean", deitoratu du.

Halere, argi du egiten dituzten irteerek bultzada ematen diotela hizkuntzari. "Gazteak mendian euskaraz mintzo dira. Kostatu arren, ahalegina egiten dute eta konturatzen dira ez dela soilik mendiko kontua. Euren bizimoduan aldaketa bat gertatzen da euskaraz bizitzean".

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun