Animalien babesari buruzko legeak ezartzen duen bezala, udalei dagokie abandonatutako edo galdutako etxeko animaliak biltzea. Horregatik, Lemoizko Udalak herritarrei jakinarazi die animalia lan-ordutegian aurkitzen bada, hau da, astelehenetik barikura, lanegunetan, 08:00etatik 15:00etara, Udaleko telefonora deitu behar dela: 946 879 037. Udaletik jarduera-protokoloa aktibatuko da eta bilketa kudeatzeko udal-brigadari abisua emango zaio.
Txakurra edo katua ordutegi horretatik kanpo edo jaiegunetan ikusten bada, Ertzaintzak aktibatuko du protokoloa, eta, beraz, 112 zenbakira deitzea gomendatzen da.
Lemoizko Udalak gogorarazi gura du oso garrantzitsua dela horrelako kasuetan azkar jardutea, pertsonen eta animalien osasuna arriskuan jartzen duten egoerak saihesteko: harrapaketak, pertsonen edo beste animalien aurkako erasoak, gosea, etab.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!