Proiektuak bi fase ditu, pintura lehiaketa bera, eta aukeratutako fatxadan horma-irudia egitea lehiaketaren marrazki bat edo gehiago oinarri hartuta. Lehenengo fasea maiatzaren 25ean egingo da, Urizarko frontoi irekian.
Eguneko egitaraua honako hau izango da:
- 10:30etik 11:00etara lehiaketan parte hartzen duten pertsonen izen-ematea.
- 11:00etatik 14:00etara lurrean marrazki-pinturak egitea.
- 14:00etan epaimahaiaren bilera marrazki eta ideia irabazleak aukeratzeko.
Lehiaketaren materialak, klariona eta ikatz-ziria, Lemoizko Udalak jarriko du. Jorge Rubio eta Sonia Rueda artista profesionalek eta Jai Batzordeko kide batek osatutako lehiaketako epaimahaiak marrazki edo ideia irabazleak aukeratu ondoren, proiektuaren bigarren fasean paretan islatuko den zirriborroa egingo da.
Sariak hauek izango dira:
- 1. saria: 200 euro.
- 2. saria: 100 euro.
- 3. saria: 50 euro.
Lehiaketaren irabazlea edo irabazleak aurkezpen ekitaldi batean jakinaraziko dira, 2024ko ekainaren 29an Armintzako Kultur Etxean, 'Pinturitas' tailerraren urteroko erakusketarekin batera. Horrez gain, proiektuaren lehen fase honetan ateratako argazkiak erakutsiko dira.