Gainera, Atalaia kaletik portura sartzeko arrapala ere talde teknikoarentzat erreserbatuta egongo da filmaketak irauten duen bitartean, eta Armintzako kultur etxean jantzitegi- eta makillaje-lanetarako gune bat izango dute. Aparkaleku-murrizketa horiek martxoaren 20ko 08:00etatik martxoaren 22ko 06:00etara izango dira.
Ramiro Pinilla idazle bizkaitarraren Las ciegas hormigas eleberrian oinarrituta dago film hau. 1960ko hamarkadan hasitako narratiba espainiarraren korronte berritzailean parte hartu zuen. Euskal Herrira emigratutako langileen egoera eta egoera horren eragin sozialak dira bere eleberrietan behin eta berriz errepikatzen den gaia.
Lemoizko Udaletik, adierazpide artistiko guztiak babesteko konpromisoa berretsi dute: "Gure ustez, zinemak, musikak, literaturak, dantzak eta gainerako kultur adierazpenek herri gisa dugun nortasuna aberasteaz gain, funtsezko zubiak dira beste errealitate batzuekin konektatzeko eta gure euskal kulturaren aberastasuna munduarekin partekatzeko. Gure komunitatearentzat harro egoteko modukoa da gure historiak, tradizioak eta balioak islatzen eta gordetzen dituzten proiektu sortzaileak garatzen eta sustatzen laguntzea".
Halaber, Udalak adierazi du badakiela bi egun horietan eremu horretako bizilagunek deserosotasunen bat jasan ahal izatea. "Ulertzea espero dugu, erakundeen zein herritarren laguntza beharrezkoa baita Euskal Herriko memoria historikoa bizirik mantentzen laguntzen duten proiektu hauek aurrera ateratzeko", adierazi dute.
