Lehenengo emanaldia maiatzaren 9an, barikuan, izango da. Zirkotxoskok OhPera obra mutua eskainiko du, non istorioak irudi eta akrobazien bidez kontatuko dizkiguten: Bizitzaren aukeren aldeko bidaia, gure egunerokotasunean egiten ditugun hautuen bidez, non maitasuna baita batzen dituen materia iluna. 18:30etik aurrera izango da.
Zapatuan, maiatzaren 10ean, antzerki saio bikoitza izango da lemoiztarren gozamenerako. 13:00etan, Hortz Mugak euskarazko antzezlana taularatuko du: Agurea, urpekaria eta itsasoa. Itsasoak elkar ezagutzen ez duten bi pertsona elkartuko ditu, izenik gabeko leku batean. Zer esan ez dakitela, elkar laguntzen eta beren buruak erreskatatzen ikasiko dute.
Arrastian, 18:30etik aurrera, Zanguango Teatro konpainiaren txanda izango da, El peor espectáculo del mundo antzezlanagaz. Barre-algarak izango dira "auzoko heroi bat protagonista duen BIOPIC bategaz, munduan denetik egon behar duelako dagoen ezinbesteko izakia". Obra gaztelaniaz izango da.
Azkenik, domekan, 13:00etatik aurrera, Barsanti Konpainiaren txanda izango da, Kale gorrian lanagaz. Bertan, "40 urteren ostean poliziaren eta bizilagunen aurrean familia-etxea utzi behar duten adineko senar-emazteen etxegabetzea" antzeztuko dute. Barreak ere ziurtatuta daude euskarazko antzerki emanaldi honetan.
