Azken hilabeteetan, Red Eléctrica de España (REE) estatuko garraio elektrikoaren sareari lotutako obra garrantzitsuak egiten ari da Lemoizen. Azpiegitura hori interes orokorreko obratzat jo du Trantsizio Ekologikorako Ministerioak, eta horrek esparru juridiko berezi batean kokatzen du proiektua: lanak ez daude ohiko udal-zerga batzuen mende Egoera honen aurrean, Lemoizko Udala formula berriak aztertzen ari da obra horiek herrian izango duten eragina arintzeko.
Azaldud utenez, Udalak ezin dituenez ohiko zergak aplikatu, Red Electricak Lemoizen egingo diren hobekuntza-jarduerak finantzatzea lortu gura du. Helburua da azpiegitura horri lotutako baliabide ekonomikoen zati bat zuzenean herrira itzultzea dela zehaztu dute, lemoiztarren bizi-kalitatea hobetuko duten proiektuak bideratzeko.
Nolanahi ere, Udalak ez ditu erabaki hauek bakarrik hartu gura izan, eta herritarrei hitza ematea erabaki du. Horregatik, prozesu parte-hartzaile bat ireki da, bizilagunek energiaren arloagaz lotutako proposamenak aurkeztu eta udalerriaren behar nagusiak baloratu ditzaten.
Prozesu honi hasiera emateko, herritarrei dei egiten zaie Armintzako Kultur Etxean urtarrilaren 22an, osteguna, 18:30etik aurrera egingo den herri-bilera batera. Gainera, proposamenak 2026ko otsailaren 15era arte erregistratu ahal izango dira, bai udaletxean bertan, bai egoitza elektronikoaren bidez.