Langileek azpikontratatutako zerbitzua ematen diete Bimepi eta EEEri, eta Armintzako lantokitik Tecnaliak eta beste enpresa batzuek Bizkaiko kostaldean dituzten balizak eta ikerketa-tresnak zaintzen. ELA sindikatuak ordezkatutako plantillak azaldu duenez, egungo hitzarmenak "segurtasun pribatuari" lotutako baldintzak arautzen ditu, baina euren eguneroko zereginak oso bestelakoak dira; horregatik, 2025eko martxoan enpresari hitzarmen propioa eskatu zioten.
Aldarrikapenen artean, lan-egutegiaren antolakuntza hobetzea ezarri dute lehen lerroan, hitzarmenak ezartzen dituen orduak modu egokian betetzeko. Halaber, kategoria profesional bi proposatu dituzte —patroia eta marinela— egiten dituzten zereginen araberako aitortza izateko. Soldaten atalean, 1.600 eurotik gorako soldata duinak ere eskatu dituzte, kopuru horretara iristeko aparteko orduetan oinarritu gabe. Horrez gain, opor-egun gehiago eta ordaindutako baimenen hobekuntza ere eskatu dituzte, beste neurri batzuen artean.
Langileen arabera, hiru bilera egin dituzte enpresagaz, eta EEEgaz ere bildu dira; bilera horretan, adostu zuten erakundeak enpresari eskatzea plantillaren hitzarmen-proposamena aztertzeko. Orain, negoziazioak bideratzeko eta presioa handitzeko, mobilizazioei eutsi diete eta elkarretaratzeakaz jarraituko dutela iragarri dute.