Domekan, apirilaren 19an, mendi irteera berria egingo dute Lemoizko Etzandarri Mendi Taldeko kideek, oraingoan Gipuzkoako Aralar aldera joz. Goizean goiz abiatuko dira Abaltzisketako Larraitz auzotik, Ausa-Gaztelu (901 metro) mendia konkistatzeko asmoagaz.
Mendi honek "Txindokiren bikia" izengoitia hartzen du, haren ondoan kokatuta egoteaz gain, itxura antzekoa duelako. Altuera baxuagoa duenez haren osperik ez duen arren, antolatzaileek nabarmendu dute tontor "ikusgarria" dela. Gainera, karga historiko handia du: izena bertan egon zen gaztelu batetik datorkio, antzina Enirioko galtzada babesteko erabiltzen zena, eta gaur egun oraindik gotorleku haren aztarnak ikus daitezke gailurrean.
Guztira 9 kilometro inguruko bidea izango da. Antolatzaileek "erraza-ertaina" gisa sailkatu dute txangoa: ibilbidean zehar ez dago zailtasun teknikorik, baina kontuan hartu behar da azken igoera "gogorra" dela. Hori dela eta, sasoian egotea gomendatzen da azken esfortzuari aurre egiteko.
Irteera honetarako desplazamenduak parte-hartzaileen auto partikularretan egingo direla iragarri dute, modu banatuan. Hitzordua 09:00etan jarri dute, Armintzako autobus geltokian, eta 18:00etarako itzultzea aurreikusi dute. Era beran, gogorarazi dute Lemoizko Udalak urtean bitan baino ez duela jartzen autobusa taldearentzat; aurten, maiatzeko eta urriko irteeretan izango da zerbitzu hori erabilgarri.