Lehenengo hitzordua ekainaren 27an izango da, barikuan, 18:00etan, Armintzako Kultur Etxean. Bertan, Wadak burua txoritxoz beteta dauka antzezlana eskainiko dute, umeei eta familiei zuzendutako ikuskizuna. Obrak Wada izeneko neskatxaren bidaia kontatzen du: etxea utzi eta askatasunaren, zorionaren eta mundu hobe baten bila abiatuko da, ametsez, desioz eta irudimenez betetako burua lagun.
Bidean, Wadak hainbat erronkari egin beharko die aurre, tartean plastikoz kutsatutako ozeanoei, desberdintasunei, diskriminazioari eta injustiziei. Hala ere, istorioak aniztasuna, berdintasuna, errespetua eta itxaropena ere izango ditu ardatz, magia, umorea eta emozioa uztartuta, mundu bidezkoago eta jasangarriago bat eraikitzea guztion esku dagoela gogorarazteko.
Bigarren jarduera ekainaren 28an egingo dute, LGTBI+ Harrotasunaren Nazioarteko Egunean bertan. 12:30ean, eskulan tailerra izango da Armintzako portuan, eguraldiak laguntzen badu; euria eginez gero, jarduera Armintzako Kultur Etxera lekualdatuko dute. Udalak herritar guztiak gonbidatu ditu ekimenetan parte hartzera eta aniztasuna ospatzera.