Apirilaren 2an itxiko dute Plentziako metro-geltokia

Erabiltzailearen aurpegia Hiruka 2015eko martxoaren 20a

Metroaren ordez, autobus zerbitzua ezarriko dute.

Gero eta gutxiago falta da Plentziako metro-geltokia ixteko. Apirilaren 2tik aurrera, ez da Plentzia eta Sopela arteko metro zerbitzurik egongo, eta egun horretan bertan Plentziatik Larrabasterrara arteko bus-zerbitzua ipiniko dute, bost egunez. Ondoren, apirilaren 7tik aurrera, bus-zerbitzu hori Plentzia eta Sopela batuko ditu, Urdulizko trenbide-pasagunea lurperatzeko lanak irauten duten bitartean; obrok 18 hilabete iraungo dutela aurreikusi dute. Metroak dituen ordutegi eta maiztasun berberak izango ditu ordezko autobus-zerbitzuak.
Urdulizko obra horiekaz, metroaren sareko azken trenbide-pasagunea kenduko dute, trenbideko 543 metro lurperatu ondoren.

Une honetan, Metro Bilbaoren ustiapenari dagozkion egokitzapenei ekin diete trenbidean bertan, katenarian, seinaleztapenean, komunikazioetan eta Aginte Mahai Nagusian.

Dagoeneko obrako materialak pilatzeko eta obraren perimetroa hesitzeko lehenengo lanak abiarazi dituzte; ataza horiek egin ostean, lehenengo indusketa-lanei ekingo diete. Lanak egiteko 21 milioi euroko aurrekontua izango dute.

Urdulizko trenbide-pasagunea lurperatzeak 6.000 metro koadrotik gorako aisialdirako gunea sortzea ekarriko du. Horrez gainera, lurpeko geltokia eraikiko dute, “fosferito” eta guzti.

Jendartea Plentzia
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun