Parte hartuko duten 10 traineruek 3.500 metro egin beharko dituzte. Ondoren, hamaiketakoa izango dute, zaleakaz batera. Plentziakoa ez da Arraunlari Beteranoen Elkarteko aurtengo Ligak Uribe Kostan jokatuko duen estropada bakarra. Abuztuaren 15ean, Portu Zaharrera hurbilduko da; abuztuaren 29an, Erandiora; eta lehiaketaren amaiera ere, Armintzan izango da, irailaren 19an. Halere, azken estropada horietan edozein puntu erabakigarri izan daiteke. Gaur egun, Batera traineru plentziarrak dauka ligaren lidergoa, 57 puntugaz, baina estu jarraitzen dio Zierbenako eskifaiak, orain arteko 7 estropadetan 55 puntu metatu baitituzte. Hiru ohiko faboritoetako hirugarrena, Getxo, taularen erdian dago, bosgarren postuan, 38 puntugaz. ABE Ligako 10 traineruen artean, aipatutako biez gainera, Uribe Kostako beste bat dago: Lutxana, Deustugaz taldea osatuta.
Joseba Bilbaok umil dio: "hoberenak irabaz dezala", Plentziako estropadaren zein Ligaren gainean berba eginda. Halere, ez ditu ezkutatu Baterak Liga laugarren aldiz irabazteko duen gogoa: "2015a guretzat urte garrantzitsua da, kirol zein kultur elkarte gisa; sendotze urtea. Kirol-mailan izan dugun hobekuntza kontuan hartuta, erronka handiak izango ditugu: Munduko ligarik onenaren laugarren entorchado-a irabaztea...". 2007an, 2008an eta 2010ean irabazi zuen Arkotek. Jorge Madariaga gorliztarra zuhurragoa da, eta ez du garaipenaz berba egin, baina, badaezpada, ondo atontzen du zapatuan estropadaren garaileek jasoko duten bandera. Arraunlaria izateaz gainera, Bateratxu maskotaren egilea ere da Madariaga.