Datorren barikutik aurrera, hilak 4, Plentziako Udalak herritarren esku jarriko du 2016ko udal-egutegia Goñi Portalean, gura duenak har dezan. Joan den urriaren 5ean hiribilduaren sorreraren 716. urteurrena ospatu zen, eta ospakizun horren harira, besteak beste, neska-mutilentzako marrazki lehiaketa antolatu zuten. Hala, aurten egutegia ez da argazkiz osatuta egongo, baizik eta herriko biztanle txikienek Plentziaz duten ikuspegia erakusten duten marrazkiez.
"Plentzia Haurren Begietan" lelopean, hainbat kategoria eta adinen arabera saritutako 12 marrazkiek hornituko dituzte 2016ko egutegiko hilabete guztien irudiak. Azalean eta kontrazalean, berriz, parte-hartzaile guztiei omen egiteko eta eskerrak emateko nahasketa bat agertuko da.
Bihar, eguenagaz, Euskararen Egunean, eskolan jasoko dute umeek egutegia, inork baino lehenago ikus dezaten.
Era berean, eta aurreko urteetan bezala, egutegi bana helaraziko diete Barrikako Elorduy Egoitzan bizi diren plentziar guztiei.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
