2011ko uztailaren 7an auto-istripuan zendutako Alex Arana Etxebarria zinemazale plentziarra omentzeko abiatu zuten, hura hil eta urtebetera. Hala, elizaren aurrealdea zinema bihurtuko da bosgarren aldiz. Genero beltzari eskainitako jaialdia da, eta film laburren lehiaketa dauka ardatz. Oraindino egitaraua zehaztuta ez daukaten arren, daborduko mundu osoko 15 pelikula hautatu ditu epaimahaiak, aste-akabu horretan ikusgai jarri eta onenak saritzeko. Hala, 2.000 euro jasoko ditu epaimahaiak aukeratutako film laburraren egileak; eta 700 euro, ikusleek aukeratutakoaren autoreak. Euskal pelikularik onenak 800 euro jasoko ditu.
Gainera, berbaldiak, kontzertuak (Joseba Lenoir Duo eta Moonshakers taldeen parte-hartzea hitzartuta daukate), argi-ilunen ikuskizuna (Mario Jimenezen ardurapean), poker-partidak eta beste hainbat jarduera egongo dira. "Iberia FX. Cinefectos. Oficio y artificio en el cine español" erakusketa abuztuaren 12tik 20era egingo dute.
Hautatutako film laburrak
- "The package", Ted Atherton (Kanada).
- "El lugar adecuado", Fernando Franco (Espainia).
- "Lost Village", George Todria (Euskal Herria).
- "The sky queen", Simon Maignan (Frantzia).
- "Hostal Eden", Gonzaga Manso (Espainia).
- "The noise of liking", Nadaja Andrasev (Hungaria).
- "The food chain complexity", Maciej Gajewski (Polonia).
- "5 segundos", David Gonzalez (Euskal Herria).
- "The procedure", Calvin Lee Reeder (AEB).
- "The suitor", Alvaro Congosto (Espainia).
- "Down by love", Jose Corral (Espainia).
- "Duellum", Tucker Davila (Euskal Herria).
- "Decorado", Alberto Vazquez (Espainia).
- "Disco inferno", Alice Waddington (Espainia).
- "A prueba", Pablo L De Aramburu (Espainia).