Arkote, KAE-1 ligarako prest

"Plentzitarra"-ko arraunlariak garaipena ospatzen Plentziako bigarren banderan, abuztuaren 28an. © ARKOTE

"Plentzitarra"-k historia egin du, eta datorren denboraldian KAE Ligako lehenengo mailan jardungo dute Arkoteren arraunlariek, orain dela bost urte legez.

Datorren urtean ez da nahikoa izango Kantauriko Arraun Elkartearen Ligako bigarren mailako emaitzak bakarrik behatzea eskualdeko traineru gehienen berri izateko. Izan ere, KAE-1 kategorian Uribe Kostak ordezkaritza izango du berriro ere: Plentziako Arkote klubarena. Balentria denboraldi osoaren ahaleginari esker lortu badute ere, abuztuaren azken proba bietan errematatu zuten: Colindres-en eta Plentzian jokatutako igoera eta jaitsiera playoffetan.

Aitor Gilek agindutako arraunlariek maila ederra eman dute tostaren gainean, pasa den uztailaren 2an Altzagan uretaratu zirenetik. Ordutik, eta abuztuaren 21eko Camargoko proba bitartean, bandera bi irabazi dituzte, Sestaokoa eta Plentziakoa. Gainera, erregulartasun handia erakutsi dute, zortzi estropadetan bigarren lekuan sartuz. Hortik behetik ibili diren hiru saioetan ere, ez dira bosgarren postutik jaitsi. Hamahiru estropadetan metatutako 162 puntuak ez dira nahikoak izan Oiartzungo itsaslapurrak gainditzeko, baina bai KAE-2ko bigarren geratu eta igoera fasean sartzeko.

Santurtzi, Hibaika eta Sanpedrotarra traineruen aurka, hori-beltzek ez zuten hutsik egin eta Colindresen zein Plentzian bandera irabazi zuten, nahiz eta Kantabrian Santurtzitik azpian geratu ziren. Hala ere, playoff fasearen berdinketak ziurtatu die KAE-1era igotzea datorren denboraldian.

Arraunlariek ez ezik, hiribilduko zale eta auzokideek Arkoteren lorpena ospatu zuten pasa den abuztuaren 30ean. Egun horretan, harrera egin zieten "Plentzitarra" traineruaren arraunlariei Astilleron.

Gipuzkoako Ligaren irabazlea

Gizonezkoak ez dira izan garaipenak ospatu dituzten Arkoteko kide bakarrak. Jone Oliban Lizarraga arraunlariak Gipuzkoako Liga irabazi du Hibaikagaz. Kontxa ere eskura dauka.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun