Bizkaiko Ikerketa Kriminaleko Lurralde Zerbitzuko ertzainek 56 urteko gizonezko bat atxilotu zuten Meñakan, herenegun, eguaztenean; joan den ekainean, Plentziako banku-sukurtsal batean lapurreta egitea leporatzen diote. Eusko Jaurlaritzaren Segurtasun Sailak zabaldutakoaren arabera, atxilotuak pistola batez mehatxu egin zien langileei, eta diru xehean eroan zuen harrapakina. Bigarren pertsona bat ere ikertzen dabiltza, egintzen konplizea delakoan. Atxilotua herenegun eroan zuten Getxoko gau eta eguneko epaitegira.
Lapurreta ekainaren 23an gertatu zen, Plentziako banku-sukurtsal batean. Bertan, hiru langile eta bezero bat zeudenean, aurpegia zapi batez estaltzen zuen gizonezko bat sartu zen, polizia-iturriek diotenez. Pistola atera eta mehatxu egin ei zien, kutxan zegoen dirua eman ziezaioten. Harrapakina hartu, eta bertatik ihes egin zuen.
Egintza horien ostean, Ertzaintzak egilea identifikatzeko ikerketa hasi zuten. Herenegun amaitu zen polizia-lana: ustezko egilea atxilotu zuten Meñakan, eta, era berean, beste pertsona bati ere egotzi diote lapurretan parte hartzea. Ustez, pertsona horrek zuzeneko egileari ibilgailu batean ihes egiteko "beharrezko estaldura" eskaini zion, lapurretaren ostean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
