[Argazki-galeria] Barrikadak antzeztu dituzte Plentzian

Lehenengo barrikada Plentziako zubiaren ondoko plazan egin zuten. © ITXAS ARGIA

Barrikadak Zuberoako maskaradetan egiten diren dantza-antzerkiak dira. Plentzian domekan egin zituzten, hilaren 15ean. Hasiera batean otsailaren 11n egin behar ziren, neguko jaia delako hori. Baina, eguraldia dela eta, apirilera atzeratzea erabaki zuten.

Festa hori kalejiran oinarritzen da eta, bertako taldeez gain, kanpoko talde batek parte hartu behar du horretan, derrigorrez. Izan ere, kanpoko talde hori herria inbaditzera doa, eta bertoko herritarrek barrikadak antolatu behar dituzte haien etxeak eta familiak defenditzeko. Antzeztutako borrokak dira horiek eta talde bakoitzak aukeratzen du dantza, kanta edo antzezlana egitea hori irudikatzeko.

Plentzia Kantagune taldeak antolatu du festa, eta parte-hartzaileak hauek izan dira: Ongi Etorri Errefuxiatuak, Itxas Argia (Algorta), Kresaltsu (Itzubaltzeta/Romo), eta Sopelako lagun dantzariak. Talde bisitaria, aldiz, Salbatzaile Dantza Taldea (Bilbo) izan da.

Domekan hiru barrikada egon ziren kanpotik etorritako dantza-taldetik "defendatzeko". Lehenengoa Plentziako zubiaren ondoan egon zen, eta horretan Plentzia Kantagune taldeak jardun zuen; bigarrena, aldiz, Eliz enparantzan izan zen, Itxas Argia taldearen eskumenez. Azkenik, Ontziola plazan denak egon ziren kanpoko taldeagaz “borrokan”.

Argazki-galeria (© PLENTZIA KANTAGUNE-ITXAS ARGIA)

Barrikadak Plentzian 2018

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun