Udako jaiak 2019

Jazza baino gehiago da

AgorriJazzeko kontzertu bat, artxiboko irudian.

Duela urte bi sortu zuen Plentziako Udalak jazz-doinuetan oinarritutako musika-jaialdia, Plentzia Kulturaz ekimenaren barruan. Ibilbide labur horretan, indarra hartzen joan da AgorriJazz ekimena eta aurten hirugarrenez antolatuko dute, abuztuaren 9an eta 10ean. Jazza, soula eta bestelako doinuak entzun ahal izango dira aurten ere Ontziola plazan, aipatutako egun bietan, barikuan eta zapatuan, hurrenez hurren.

 Barikuan, Rezikletas taldeak perkusio-kontzertu ibiltaria eskainiko du birziklatutako eta berrerabilitako materiala erabilita, 18:00etatik aurrera. Ondoren, Aritza Castro Quartet Bizkaiko jazz-eszenan indarra hartzen dabilen taldeak Ontziola plazako agertokia hartuko du 20:00etan bertaratutako denen gozamenerako. Ondoren, Xabi Aburruzagak hartuko dio lekukoa, 22:00etatik aurrera. Trikitiagaz lagunduta, folk- eta jazz-doinuak nahastuko ditu Aburruzagak.

Hurrengo egunean, zapatuan, Bilboko Mississipi Queen & The Wet Dogs soul-boskoteak emango dio hasiera egunari, Ontziola plazan, 20:00etatik aurrera. Talde horrek indarra eta bizitasuna taularatzen ditu zuzenekoetan; disfrutatzea eta disfrutaraztea da euren helburua ematen dituzten kontzertu guztietan. Ondoren, Aupa Quartet laukoteak emango dio amaiera 2019ko AgorriJazz jaialdiari, 22:00etan hasita. Laukote horrek musika modernoan oinarritzen du bere jarduna, betiere inprobisazioari leku handia eginez.