Euskararen erabilera bultzatu eta horren presentzia herritarren eguneroko bizitzan sustatzeko kanpaina abiatu du Plentziako Udalak. Horretarako, eta abiapuntu gisa, Ontziola plazako musika kioskoaren eskudelean zazpi panel jarriko dituzte. Kanpainaren ezaugarri garrantzitsuenetako bat da auzoak eta herriko hainbat leku direla protagonista.
Hastear dauden San Antolin jaietan aurkeztuko dute ekimen hori; izan ere, ahalik eta jende gehien irudiok ikustea da helburuetako bat.
Metro geltokia, Gatzamiñe, Txipio, Saratxaga, Isuskitza, portua, itsasadarra, hondartza, Ontziola plaza, Erribera, Alde Zaharra, Gandias, Junkera eta Legarrondo dira irudion agertokiak. Horietan, guneotako eguneroko egoerak agertzen dira. Ilustrazio horien helburua da, baita ere, hainbat balio positibo sustatzea, hala nola iraunkortasuna, berdintasuna, aniztasuna, bizikidetza, kirola, herriko merkataritza edo herriko kultur ondarearen babesa.
Herriko enpresa batek (La oveja creativa) diseinatu ditu panelak, haur eta nagusien interesa erakartzeko irudi koloretsu eta pertsonaia dibertigarrien bitartez.
Ekimen horrek ere udalerriko ostalari eta merkatarien konplizitatea bilatzen du; hori dela eta, kartel batzuk argitaratu dira sektore horietako profesionalek euren lokaletan jar ditzaten.