Koronabirusa Uribe Kostan

Bide publikoak garbitzen dabil Plentziako Udala, gune publikoak desinfektatzeaz gain

Edukiontzi beilegi berria ipini dute Gatzamine auzoan. © PLENTZIAKO UDALA

Espaloietatik eta bide publikoetatik belarrak eta bestelako landareak kentzen dabiltza Plentziako kale-garbitzaileak, Udalak jakinarazi duenez. Egunotan Txipio auzoan ari dira lan hori egiten. Gainera, edukiontzi hori bat ipini dute ikastetxeen aurrean, Gatzaminen. 

Datozen asteetan txukunketa-lanak udalerri osora zabalduko direla iragarri du Elixabete Uribarri alkateak. "Gogoratu behar da Udalak, gune publikoen higienea ezin hobea izan dadin eta egon litezkeen COVID-19aren arrastoak kentzeko asmoz, bide publikoen  garbiketa- eta desinfektatze-zerbitzuak indartu zituela duela aste batzuk, batez ere pertsona gehien ibiltzen den eremuetan", esan du udal-gobernuak.

Gehien garbitzen diren eremuetako batzuk Astilleroko eremua, igogailu publikoak eta edukiontziak dira. Azken horiei dagokienez, Garbiker enpresagaz berba egin ostean plastiko-bilketa indartu duela adierazi du Udalak, Gatzamineko hiru ikastetxeen aurreko aldean edukiontzi beilegia ipiniz.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun