Koronabirusa Uribe Kostan

Dendarientzako maskarak banatu ditu Plentziako Udaltzaingoak

© PLENTZIAKO UDALA

Plentziako udaltzainek koronabirusaz babesteko 35 maskara banatu dituzte herriko 23 denda txikitan, bertako Udalak jakinarazi duenez. Ajangizko enpresa batek egindakoak dira maskarak.

Hain zuzen ere, Maier enpresak Uribe Kostako Mankomunitateari emandako sorta batekoak dira dendariei banatutako maskarak. "Gaur inoiz baino garrantzitsuagoa da merkataritza txikiko langileak babestea. Eta laguntza neurri osagarri gisa, maskara hauen bidez, lehen lerroan dauden bizilagunen segurtasuna indartzen lagundu nahi dugu, kutxen eta erakusmahaien atzean, egunez egun, elikagaien salmenta bezalako ezinbesteko zerbitzua eskaintzen ari baitira", adierazi du Elixabete Uribarri alkateak.

Bide batez, udaltzainen lana goratu du Uribarrik: "Hamabi orduko txandak egiten ari dira, zirkulazio eremuetan kontrolak egiten, herritarrei arreta ematen, kalteberatasun egoeran dauden pertsonei dei egiten, telefono interesgarriak megafonia bidez zabaltzen...", zehaztu du Udalak.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun