Plentziako Udalbatzan dauden talde biek, EAJk eta EH Bilduk, elkarregaz izenpetu eta argitaratu dute idatzi bat, sanantolin jaiak egingo liratekeen datetan herritarrei "arduraz jokatu" eta inolako ospakizunik ez egiteko eskatzeko, osasun-egoera dela eta.
"Herritar guztioi gogorarazi nahi dizuegu AURTEN EZ DIRELA OSPATUKO SAN ANTOLIN JAIAK", dio agiriak, mezu nagusia letra larriz nabarmenduta. Honenbestez, jai-giroko inolako talde-ekitaldirik ez egiteko deia zabaldu dute, "ez publikorik ez pribaturik".
Era berean, lokaletan zein kalean ez pilatzeko saiakera egin beharra dagoela adierazi dute talde politiko biek. "Orain lehentasuna da segurtasuna eta osasuna bermatzea gure zahar eta umeei, gure herritar guztiei".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!