Batzarrean, elkarteek hiru eskari egin dizkiete udal-ordezkariei: lehenik, komunikazio-mahai bat sortzea, Udalaren eta elkarteen arteko komunikazioa egon dadin, orain arte albiste guztiak ahoz aho jaso dituztela diotelako. Bigarren puntuan, elkarteek beraien egoitza barrakoi batzuetan jartzeko aukera proposatu dute, "Udalak ez du dirurik izango eraikina berreraikitzeko, eta lekurik gabe geratzen garenez, barrakoi batzuk jartzeko proposatu diegu", azaldu dute elkarteen ordezkariek. Hirugarren puntuan, aldiz, epe laburreko beste aukera bat ematea eskatu diote Udalari, lokal publikoetan edo frontoian birkokatzeko aukera ematea, Arpillaon gordetzen duten guztia nonbait sartu ahal izateko.
Batzarrean bakarrik adostu dute komunikazio-mahai osatzea, eta elkarte kaltetuenak frontoian kokatuko dituztela, "baina ez dute zehaztu zeintzuk izango diren", azaldu dute elkarteetatik. Momentuz, urtarrilaren 12an berriro batzartzea erabaki dute, eta elkarteek beraien egoera salatzeko, domekan kontzentrazioa egingo dute, 12:30ean, Ontziola plazan. Herrian presioa egiteko asmoz, etorkizunean beste ekintza batzuk egingo dituztela ere aurreratu dute.
Arpillaoko elkarteak, haserre
Elkarteetako kideak haserre daude, ez zekitelako eraikina bota behar zutela, baita erabaki horrek ustekabean harrapatu dituelako ere. Elkarteen arabera, Udalak irailaren 24tik zekien eraikinaren egoera txarra dela eta hori bota behar zutela, baina ez zien ezer esan; aitzitik, lokalen lagapenari buruz hitz egiteko eta pandemiaren neurrien testuinguruan bertara bueltatzeko bai batu ziren.
Udala komunikatu bat prestatzen ari da gai horren arira, eta bere iritzia hurrengo egunetan argitaratuko duela jakinarazi du.
