Plentziako barne-portu berriaren amarralekuen esleipena Eusko Legebiltzarrera eraman du EH Bilduk, horren atzerapena eta gardentasuna falta "nabarmena" izan direla gaitzetsita. Zozketa martxoaren 31n notarioaren aurrean egin ondoren, Euskadiko Kirol Portuak erakunde publiko kudeatzaileak PROA Kirol Elkarte Nautikoari adierazi zion apirilaren bigarren erdialdean ezagutaraziko zituztela emaitzak. Baina argitalpena atzeratuz joan da, eta EKPk adierazi zuen emaitzen argitaratzea maiatzaren erdialdean egingo zuela.
Gauzak horrela, Unai Fernandez EH Bilduko legebiltzarkide eta bozeramaileak Eusko Legebiltzarrera eraman du gaia, Jaurlaritzari atzerapen horren zergatiaz galdetzeko. Prozesuan emandako gardentasun-falta dela eta, zozketagaz lotutako espediente osoaren kopia bat ere eskatu du bozeramaileak.
Bere aldetik, EKPk adierazi du atzerapen hori "EHAAn argitaratzeko dokumentuak dituen zailtasunagatik" izan dela. Eta azaldu dutenez, izan dituzten eskaera kopuru handia dela eta eskabide bakoitza banan-banan aztertu behar izan dute.