Elkarretaratzea egingo dute asteburuan Plentzian erasoa jasan zuten dendariei elkartasuna adierazteko

Ander Zarraga 2021ko eka. 17a, 11:30

Suyun Chen eta Jiayan Yek Plentziako Areatza klaean dute beraien denda. © GOOGLE

Zapatuan, adingabeko bik Plentziako dendari bati eta bere alabari eraso egin zieten, maskara batzuk lapurtzen saiatu eta gero. Horren aurrean, saltzaileei elkartasuna adierazteko elkarretaratzea egingo dute gaur, ekainaren 17an, Alimentación dendaren aurrean, 20:00etan.

Gertaera zapatuko 21:00ak aldera izan zen, 14 eta 15 urteko neska bik Areatza kaleko 16 zenbakian dagoen elikagaien dendan musukoak lapurtzen saiatu zirenean. Suyun Chen eta Jiayan Ye ama-alaba dendariek El Correo egunkariari kontatu diotenez, erasotzaileetako batek 50 zentimo balio duten maskarak eskatu zizkien. Chenek maskarak erakutsi zizkionean, neskak batzuk hartu eta lasterka ihes egin zuen. Chenek kontatu du bere atzetik atera zela dendatik, eta, momentu horretan, ustezko lapurrak jipoitu omen zuela. Ama defendatzera atera zen Ye, eta, orduan, ustezko erasotzaileak eta beste lagun batek bera ere jo eta lurrera bota zuten.

Momentuan bertaratu ziren Ertzaintzako agenteek erasotzaile biak atxilotu zituzten, nahiz eta, ondoren, karguakaz aske utzi zituzten. Bestalde, anbulantzia batek Urdulizko ospitalera eraman behar izan zuen Jiayan Ye, zorabiatuta baitzegoen. Chenek eta Yek kontatu dutenez, gurean daramatzaten hamar urteetan ez zaie horrelakorik gertatu.

Elkarretaratzea

Ari Du Elkartasun Sareak argitaratu duenez, eraso hori salatzeko, eta dendari biei elkartasuna adierazteko, elkarretaratzea egingo dute gaur, ekainaren 17an, Areatza kalean dagoen Alimentacion dendaren aurrean, 20:00etan.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun