Atzo gauean, abuztuaren 31n, Plentziako Alde Zaharrean gertatutako istiluetan, Ertzainak hiru gizon atxilotu zituen desordena publikoak eta agintaritza-agenteen aurkako atentatua egitea egotzita. Eusko Jaurlaritzako Segurtasun Sailak jakinarazi duenez, horren aurretik, ehunka lagun pilatu ziren inguru horretan, eta horietako asko ostalaritza-lokalen kanpoaldean ari ziren edaten, osasun-neurriak bete gabe.
La ertzaintza disparando bolas de goma a altura de la cabeza (seg. 20) a gente que está sentada en una terraza en Plentzia. @eitbAlbisteak @sextaNoticias @telecincoes @rtve @cuatro @antena3com pic.twitter.com/XvLOoNkgiA
— Jon (@Jon_96_) August 31, 2021
Ertzaintzak azaldu duenez, Getxoko ertzain-etxeko eta Brigada Mugikorreko agenteek megafoniaz jakinarazi zieten ingurua utzi behar zutela. Bildutako askok alde egin zuten arren, talde bat bertan geratu eta aulkiak, botilak eta beste objektu batzuk botatzen hasi ziren polizia-agenteen aurka.
Jarraian gertatu ziren istiluetan, hiru gizon, 21 eta 25 urteko heldu bi eta adingabe bat, atxilotu eta ertzain-etxera eraman zituzten. Adin nagusikoak epailearen esku utziko dituzte datozen orduetan, eta adingabea, berriz, aske utzi dute legezko tutoreen esku, Adingabeen Fiskaltzari jakinarazi ostean.
Plentziako Udalaren erantzuna
Plentziako Udalak sare sozialetan egin duen komunikatu batean adierazi du "nazkatuta" daudela, "gizalegearen aurkako jokabide hauekin, gizarte osoari kalte egiten diotelako, bereziki, Plentziako herritarrei". Horretaz gain, irmoki gaitzetsi dituzte istiluak eta "pertsona intolerante horiek protagonizatu dituzten erasoak bizikidetza mespretxatzen dutela" deitoratu dute. Komunikatuan, udal-agintariek eskerrak eman dizkiete Ertzaintzari eta Udaltzaingoari, "ordena publikoa berrezartzeko egiten ari diren lan guztiagatik".
Bestalde, Udalak azpimarratu du herriko jaiak ospatu behar zirela egunotarako, eta "herritarren segurtasuna bermatzeko" dispositibo berezi bat martxan jartzeko azken lerroak zarratzen ari direla. Bukatzeko, berriro ere gogorarazi dute jaiak bertan behera geratu direla Plentzian: "Ez dago inolako jairik".