"Ezagutu Plentzia" udazken-neguko turismo-gida argitaratu du Udalak

Elixabete Uribarri Plentziako alkatea eta Iñaki Saez de la Fuente turismo zinegotzia. © PLENTZIAKO UDALA

Turismo bulegoan banatuko dira hainbat ibilbide, jarduera eta ostalaritza-eskaintza biltzen dituen gida berriaren 2.000 aleak. Gainera, atzerriko turisten eta bisitarien kopuruak gora egin duenez, katalogoa ingelesez eta frantsesez ere argitaratu dute. Hala ere, herritar batzuek argitalpena kritikatu dute, deitoratuz ez dituztela herriko komertzio guztiak kontutan hartu.

Bisitarien artean Plentziako baliabide turistiko nagusiak sustatzeko helburua duen "Ezagutu Plentzia" gida argitaratu du Plentziako Udalak, udazken-neguko denboraldira begira. Udal-iturriek azaldu dutenez, liburuxkan herriko 30 bat taberna, kafetegi, jatetxe eta ostaturi buruzko informazio zehatza biltzen da.

Gainera, gida berri honek Plentziako aisialdi- eta kultur-jarduerak zerrendatzen ditu, eta herriko bazterrak hobeto ezagutzeko hainbat ibilbide proposatzen ditu: Bizkaiko Flyschetik ibilaldia, Armintzako arrantzale herrira bisita, Butroeko Gaztelura Isuskizatik, Gorliz, Plentzia eta Barrika zeharkatzen dituen ibilbide zirkularra edo angula arrantzaleen ibilbidea, besteak beste.

Plentziako turismo bulegoan doan banatuko dituzte gidaren 2.000 aleak. Gainera, azkenaldian, atzerriko turisten eta bisitariek kopuruak gora egin duenez, liburuxka ingelesez eta frantsesez ere argitaratu dute.

Horretaz gain, udalerriko hainbat tokitan dauden poltsa erraldoiak berriro binilatuko dituztela azaldu dute, "herriko erakargarritasun turistiko nabarmenenak islatuko dituzten irudi deigarriakaz".

Gidari kritikak

Sare sozialen bidez zenbait herritarrek gida kritikatu dute, eta adierazi dute udalerriko zenbait jatetxe ez dituztela sartu; deitoratu dute ez direla gainontzeko merkataritza establezimenduak kontutan hartu, hala nola farmaziak, burdindegiak, arropa dendak... Udal-iturriek ihardetsi dutenez, "gida honek bisitariek turismo-bulegoan gehien eskatzen dituzten zerbitzuak baino ez ditu jasotzen", eta gaineratu dute horren helburu nagusia, "ostalaritza, ostatuak eta turismo-enpresak bultzatzea" dela. Hala ere, argitu dute udalerrian dauden gainontzeko zerbitzuak Udalaren webgunean aurkitzen direla, eta, etorkizunean, herriko gainontzeko establezimenduak biltzen dituen beste argitalpen bat egiteko aukera ere ikertuko dutela.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun