David Crestelo ez da EH Bilduko hautagaia izango hurrengo udal-hauteskundeetan

David Crestelo Plentziako alkatea izan zen 2015-2019 agintaldian. © EH BILDU

Hiru aldiz koalizio abertzaleko zerrendaburua eta 2015-2019 agintaldian Plentziako alkatea izen den David Crestelok politikagintzako lehen lerroa utziko duela iragarri du. "12 urte ondoren, ziklo bat amaitzeko unea da. Erabaki pertsonala da eta azpimarratu nahi dut EH Bildun lanean jarraituko dudala", adierazi du politikariak.

David Crestelo 2011n aurkeztu zen lehen aldiz Plentziako alkatetzara EH Bilduko zerrendan. Ordutik, hiru udal-hauteskundetan izan da hautagaia, beraz, agintaldia amaitzean 12 urte beteko ditu Udalean; tarte horretan, alkatea izan zen 2015-2019 agintaldian. Koalizio abertzaleko bozeramaileek azaldu dutenez, abenduan EH Bilduren herri-bilerara gerturatutakoei adierazi zieten albistea, eta orain egin dute publiko, "auzokideekiko zintzotasun- eta gardentasun-arrazoiengatik".

Plentziako EH Bilduko zerrendaburu ohiaren esanetan, erabaki pertsonala da, baina ez da politikatik erabat aldenduko, koalizio abertzalean lanean jarraituko baitu: “Militatzeko modu asko daude, baina amaitu egin da nire ibilbidea politikaren lehen lerroan, beraz ez naiz berriz udal ordezkaritzako zereginetan arituko”.

Crestelok iragarritako erabakiaren ostean, Plentziako EH Bilduko hurrengo zerrendaburua erabakitzeke dago. Azaldu dutenez, oraindik, hautapen-fasea egin behar dute, "barne araudiak markatzen duen moduan".

Azkenik, EH Bilduk eskerrak eman gura izan dizkio Crestelori, "12 urtez jarraian udal-hauteskundeetan proiektu politikoaren buru izateko erakutsitako prestasunagatik. Herri bat beste modu batean eraiki daitekeela erakutsi dugu urte guzti hauetan eta horretan arituko gara aurrerantzean, Plentziako herrian bide berriak irekiz".

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun