Plentziako Udalak 2022 aurrekontua onartu du, 1,8 milioi euroko inbertsio-plan bategaz

Elixabete Uribarri Plentziako alkatea Entzun eta Ekin 1,8 milioi euroko inbertsio-plana aurkezten. © PLENTZIAKO UDALA

Entzun eta Ekin izenagaz aurkeztu du Plentziako Udalak, 2022ko ekainetik 2023ko apirilera bitartean, udalerriko auzo guztiei eragingo dieten hamar proiektuko plana. Jardueren artean, hauek nabarmendu dituzte: bideak garbitzeko eta hondakinak biltzeko zerbitzu berria, 479.100 euro; PlentziaBus garraio publikoa martxan jartzea, 93.000 euro; Mariñeleko aparkalekua asfaltatzea eta txandakako aparkaleku-zerbitzu berria abian jartzea, 373.000 euro eta jokoak berritzea eta Ontziolako haur-parkea estaltzea, 208.000 euro.

Atzo, maiatzak 26, egindako osoko bilkuran Plentziako Udalak 2022ko udal aurrekontuak onartu zituen. Udal-iturriek azaldu dutenez, Udalak 5.679.299 euroko aurrekontua izango du, aurtengo ekitaldian baino % 11 gehiago (577.006 euro, hain zuzen). Kontuak EAJren aldeko sei botoakaz onartu ziren; aldiz, EH Bilduren hiru ordezkariek aurka bozkatu zuten.

Udal-kontu berriak onartzeari esker, gobernu-taldeak Entzun eta Ekin proiektua aktibatu ahal izango duela adierazi dute, 2022an eta 2023an hiribildua biziberritzeko inbertsio-plan berezia, Plentziako auzo guztietan eragina izango duena. 1.859.100 euroko plana dela zehaztu dute, "eta herritarrek azken inkesta soziopolitikoan adierazitako beharrei eta arazoei erantzuteko premiazko 10 proiektu biltzen ditu".

"Nire betebeharra da une bakoitzean herritarrak gehien kezkatzen dituzten gaiei erantzutea. Pandemiaren kudeaketa gogor baten ondoren, hurrengo hilabeteetan Plentziako beharrizanei erantzuteko plan hau aktibatzeko konpromisoa hartzen dut”, adierazi zuen Elixabete Uribarri alkateak. “Iruzkin eta iradokizun ohikoenen artean, aparkalekurik eza, udalerriaren mantentze eta garbiketa edo auzoetara hurbiltzea daude. Plan honen bidez, Plentziako auzo guztietako sakonera txiki eta ertaineko premia nagusiei erantzun azkar eta eraginkorra emango diegu, gehienez ere urtebeteko epean. Honela, herritarrei emaitzen plan bat itzultzen diegu, 2019an hartu genituen konpromisoakaz bat datorrena, eta Covid-19aren pandemiagaz lotutako gaiei erantzun behar izan zaienez, ezin izan dena erabat gauzatu”, azpimarratu du Uribarrik.

Gaur, maiatzak 27, udaletxean egindako aurkezpenean, alkateak planak bilatzen dituen hiru helburu nagusiak azaldu ditu:

  1. Udal-zerbitzuek eta Udaleko kudeatzaileek Plentziako hiribilduari eskaintzen dioten kudeaketa hobetzea, egindako entzunaldiari erantzunez, premia horiei erantzungo dien eta Plentzian bizi diren pertsonei arreta, komunikazio eta hurbiltasun handiagoa eskainiko dien berehalako jarduera-plan bat abian jarriz.
  2. Plentziako auzo guztietan garrantzia txikiko eta ertaineko premia nagusiei erantzun azkar eta eraginkorra ematea urtebeteko epean.
  3. Herritarrei emaitzen plan bat itzultzea, Plentziako Udalak 2019an hartu zituen konpromisoakaz bat datorrena, eta COVID-19aren pandemiagaz lotutako gaiei erantzun behar izan zaienez, ezin izan dana erabat gauzatu.

Hauek dira Entzun eta Ekin planeko hamar jarduerak:

  1. Plentziako kaleak eta auzoak zaintzeko zerbitzua indartu: 132.000 euro. Plentziako Brigada zerbitzurako hiru pertsona gehiago kontratatzea, galtzaden hobekuntza indartzeko, altzari publikoak mantentzeko, obra gehigarri txikiak egiteko eta herriko oinarrizko zerbitzuak hobetzeko.
  2. PlentziaBus, auzoetako garraio publikoa: 93.000 euro. Plentziako auzoak metroagaz, udalerriaren erdiguneagaz, portuagaz eta
    hondartzagaz lotuko dituen autobus zerbitzu publikoa, Barik sistema erabiltzea ahalbidetuko duena eta Metro Bilbaogaz eta Bizkaibusegaz deskontudun tren-aldaketak egitea ahalbidetuko duena.
  3. uzoetako hobekuntzak eta lanak bultzatzeko prozesu parte-hartzailea: 230.000 euro. Auzoekin Bat Plentziako Udalaren entzute aktiboko ekimena izango da auzoak hobetzeko. Horretarako, Inbertsio Plan Berezi berri bat izango da, 200.000 eurokoa, auzo bakoitzean obra txikiak egiteko eta mantentze-lanak egiteko.
  4. Kaleko garbiketarako eta hondakinen bilketarako zerbitzu berria: 479.100 euro.Kaleak garbitzeko eta hondakinak biltzeko zerbitzuen lizitazio berria, udalerriko eremu publiko gehiagotan garbiketa indartzea eta pintadak kentzea eta edukiontziak berritzea aurreikusten duena.
  5. Marineleko aparkalekua asfaltatu eta txandakako aparkatze-zerbitzua: 373.000 euro. Marineleko aparkalekua 104 plaza baino gehiagogaz asfaltatu eta handitzeko obrak, hiribilduaren erdigunean, baita txandakako aparkaleku-eremuei (eremu urdina) berriro ekitea ere, makina automatikoen sistema baten bidez.
  6. Umeentzako jolastokia Ontziolan, aterpe eta zabu berrituakaz: 208.000 euro. Ontziolako haur-parkea guztiz berritzea, estalki bategaz, haurrek urteko egun guztietan jolastu ahal izan dezaten, eta zabu berriak instalatzea, egungoak ordezkatuz.
  7. Plentziako tren-geltoki zaharra berreskuratzeko proiektua: 18.000 euro. Geltokiko eraikina arkitektura aldetik berreskuratzeko proiektu bat garatzea, Plentziako turismo-bulego berria eta auzoetatik gertu Udalaren beste zerbitzu batzuk jartzeko.
  8. Plentziako gazteentzako gune eta jarduera berriak: 35.000 euro.Gazte-jardueren zerbitzurako eta Topalekuko gunerako lizitazio berria, hurbileko eta udalerriko gazteen beharretara egokitutako zerbitzua eskaintzeko aukera emango duena.
  9. Berdintasun agenda, LGBTIQ+ aniztasuna eta emakumeen kirola: 35.000 euro. Gora Plentzia Feminista lelopean jarduerak eta ekitaldiak sustatzea, ekainean Plentziako LGBTIQ+ Harrotasuna bultzatzea eta tokiko klubakaz batera emakumezkoen kirola bultzatzea.
  10. Herriko jaiak berreskuratzea eta ekitaldi berriak garatzea: 256.000 euro. Aurrekontu-partida nabarmen handitzea Plentziako tokiko jaiei ilusioz berriro ekiteko, auzo guzti-guztietako programazioaren bidez. Gainera, ekitaldi estrategikoen eremu berri bat sortuko da, udako jaialdiak eta Udalaren eta Plasencia Butroe Museoaren urteurrenak ospatzeko.
Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun