Hiribilduan euskara sustatzeko diru-laguntzak eskatzeko epea ireki du Plentziako Udalak

Plentziako Udalak 19.000 euro bideratuko ditu aurten hiribilduko erakunde eta elkarteek euskara sustatzeko gauzatutako sentsibilizazio- eta kontzientziazio-ekimen, ekitaldi, programa eta bestelako proiektuak diruz laguntzeko. Aurkeztutako proiektuak 2022an gauzatu beharko dira, eta diruz lagundu daitezkeen gastutzat hartuko dira. Eskabideak aurkezteko azken eguna abuztuaren 20a izango da.

Laguntzak Plentziako irabazi-asmorik gabeko pertsona juridikoei zuzenduta daude, baldin eta diru-laguntzaren xede den jarduera egiteko asmoa badute, egoitza soziala udalerrian badute eta Udaleko Elkarteen Erregistroan inskribatuta badaude, azaldu dutenez.

"Deialdi honen bidez, Udalak plentziarren egunerokotasunean eta, bereziki, aisiaren, kulturaren eta kirolaren alorretan euskararen erabilera sustatu nahi dugu, baita lan arloan ere", azpimarratu du Elixabete Uribarri alkateak.

Interesa duten entitate eta erakundeek Plentziako Udalaren egoitza elektronikoaren bidez aurkeztu beharko dute eskabidea, abuztuaren 20a baino lehen, egun hori barne.

Plentziako Udaleko Euskara Sailak behar den laguntza teknikoa edota aholkularitza emango duela iragarri dute. Horretarako, Euskara Zerbitzuaren helbide elektronikoa erabili ahal izango dute interesdunek.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun