Irudietan, metroaren eta itsasadarraren parean pasatzen den BI-2122 errepidearen tarte bateko karkaba garbitzen ari den behargin bat azaltzen da zaborra zuzenean itsasadarrera botatzen, botilak, papalek eta latak barne. Plentziako Udalak komunikatu batean jakinarazi duenez, langilea Bizkaiko Foru Aldundiko Azpiegituretarako eta Lurralde Garapenerako Departamentuak kontratatutako ABEE batekoa da.
Irudion aurrean, Plentziako Udalak "sumindura irmoena" adierazi du eta gertatutakoa "onartezintzat" jo du. Horregatik, Aldundiari erantzukizun guztiak argitzeko eskatu dio, "Plentziako itsasadarreko ingurumenaren eta baliabide naturalen aurkako eraso zuzen eta larri baten aurrean gaudelako".
Udaleko iturriek gaineratu dutenez, gertatutakoaren berri izan duten lehen unetik egon dira harremanetan Aldundiko arduradunakaz, eta horiek Udalari baieztatu diotenez, dagokion espedientea irekiko diote ABEEko kide den konpainiari, praxi txarragatik.