Metroan musukoa jantzita ez eroateagatik segurtasun zaindariek emakume bati eraso egin diotela salatu dute

Metro Bilbaoko hiru segurtasun-zaindarik 58 urteko emakume bati eraso egin diotela salatu du Koroa Biluzik taldeak. Azaldu duenez, zaindarietako batek metro barruan musukoa janzteko eskatu zion, eta, azkenean, emakumeak onartu zuen. Hala ere, Plentziako geltokitik irteten ari zela, gauez, 22:20ak aldera, zaindarietako batek emakumea lurrera bota zuen, "beste hiruk ezer egiten ez zuten bitartean". Erasoa jasan zuena artatu behar izan zuten anbulantzia batean, eta mediku-partea atxikiz, salaketa jarri duela jakinarazi du taldeak.

Koroa Biluzik taldeak azaldu duenez, duela aste bi, Metro Bilbaoko segurtasun-zaindarietako batek maskara jartzeko eskatu zion "aske arnasten" ari zen emakume bati; horrek, azkenerako, onartu egin zuen, baina, Plentziako geltokitik irtetera zihoala, hiru zaindari bidea oztopatzen aurkitu zituela azaldu du taldeak, "inongo azalpenik eman gabe". Emakumeak "giza-hesia" zeharkatzen saiatu zen, "baina zaindarietako batek bortizkeriaz oratu eta lurrera bota zuen, besteek erasoa ekiditeko ezer egiten ez zuten bitartean. Ondorioz, hainbat lesio. Anbulantzia batean artatu behar izan zuten (geltokian zen herritar bakanetako batek hots egin zion anbulantziari). Mediku-partea atxikiz, salaketa jarri da".

Taldekoek deitoratu dutenez, halakoa ez da musukoaren derrigortasunaren harira metroan jazotako lehen oldarraldia. "Gobernuek oraintsu arte normal-normalak ziren jokabideak kriminalizatu dituztenetik (higieneaz eta traba barik arnastea, adibidez) norbanakoak egoera oso zaurgarrian gaude", salatu dute, eta aldarrikatu dute maskararen dekretu oro ezabatu beharra dagoela, baita "maskarek eragiten duten osasun-kalteen berri" ematea ere, besteak beste.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun