Guardia Zibilaren itsas-zerbitzuak legez kanpoko 39 arrantza-nasa atzeman ditu Plentziako badian

Ander Zarraga 2022ko aza. 17a, 12:33
Guardia Zibilaren patruila-ontziak lau metroko sakoneran zeuden 39 arrantza-nasa antzeman ditu. © G.Z.

Itsaskiak eta olagarroak harrapatzeko tresnak legez kanpoko sakoneran zeuden, indarrean dagoen araudiaren arabera, 10 metro baino gehiagotara jarri behar baitira, baina atzemandakoak lau metro eskasera zeuden. 

Ria Nervion patruila-ontzia Plentziako badiaren inguruan kontrol-lanak egiten ari zela, Guardia Zibileko agenteek lau buila ikusi zituzten. Arrantza-tresna profesionalak zirela egiaztatu zuten, balizen ondoan arrantza-ontziaren filiazio- eta amuzki-datuak biltzen dituen taula ere bazegoelako. Buien informazio zehatza egiaztatzeko, guardia zibilek erabilitako amuzkia azalera igo, eta 39 nasak aurkitu zituzten. Azaldu dutenez, "arrantza-tresna horiek guztiz debekatuta daude toki horretan, eta are larriagoa zen beste harrapaketa-metodo bat simulatzen zuelako".

Guardia Zibilaren arabera, "arte tranpa" izeneko metodoak itsas hondoan uzten diren kaiolak dira, kostaldetik gertu, olagarroak edo itsaskiak harrapatzeko. Plentziako badia erabat debekatuta dago horrelakoak erabiltzea, indarrean dagoen legediaren arabera, 10 metro baino gehiagoko sakoneran utzi behar baitira, eta nasak itsas hondotik lau metrora zeuden.

Bizkaiko Itsas Zerbitzuko agenteek nasetan esku hartu zuten, eta bi akta egin zizkioten horiek jarri zituen ontziaren titularrari arau-hauste larriak egiteagatik. Lehena, debekatutako lekuetan arrantza-tresnak erabiltzeagatik, eta, bigarrena, buien balizajean haien identifikazioa simulatzeagatik, hori guztia Euskal Autonomia Erkidegoko Itsas Arrantzari buruzko 6/98 Legeari jarraituz.

Guardia Zibilak gogorarazi duenez, espezieak bereizi gabe arrantzatzeak "kostu handiak ditu ingurumenean eta itsas baliabideetan". Horregatik, araututa daude bai harrapatzeko metodo egokiak, arrantzan baimendutako pieza kopurua edo gutxieneko neurria, bai arrantza-jarduera egin ahal izateko eskatzen den dokumentazioa. Gainera, "espezieak babesteko" deia egin dute, "itsas ekosistema ez kaltetzeko".

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun